20-vjeçari preu gishtat në punë, prokuroria akuzon pronarin turk si përgjegjës

Një djalë vetëm 20 vjeç preu gishtat teksa punonte në firmën CDK Pack sh.p.k, ku prodhohen kuti kartoni për pica.

Djali u aksidentua në punë, u pushua padrejtësisht nga puna dhe gjithashtu u detyrua të gënjente përpara oficerit të policisë gjyqësore duke i thënë se ishte vrarë në shtëpi dhe jo në punë.

Në muajin korrik 2021, emisioni “Stop” trajtoi rastin e Donald Tufit, në atë kohë vetëm 20 vjeç. Ai u aksidentua në vendin e punës. Pronari turk së bashku me bashkëshorten e me stafin, u përpoqën të mbulojnë krimin.

“Stop” ngriti në këmbë të gjitha institucionet, madje i kërkoi gjykatës të çonte sërish çështjen në prokurori që të nisnin hetimet, duke qenë se prokurori i parë nuk bëri asnjë hetim.

Edhe pse ka kaluar më shumë se një vit, emisioni “Stop” nuk e ka lënë në harresë këtë çështje dhe më në fund, prokuroria i mbylli hetimet dhe akuzon pronarin turk për “Shkelje të rregullave të mbrojtjes në punë”, si dhe për “Moskallëzim të krimit”, ndërsa personat përgjegjës do të dënohen.

“Bazuar në analizën e mësipërme juridike konkludohet se shtetasi Savas Karaca me veprimet e tij ka konsumuar të gjithë elementët juridik të veprës penale “Shkelje e rregullave të mbrojtjes në punë” parashikuar nga neni 289/1 i Kodit Penal”, thuhet në dosjen e prokurorisë